Fasnachtsbricht 2022

Sunntig

Am Sunntig het alles ahgfange demit, dass mir unsere Fotitermin kah hän. Doch zerst hämmer müesse unseri Sache füreträge bis zum Törli. Die Majorlarve isch doch no relativ unhandlich…

Ahcho bim Törli hämmer uns alli vo unsere beste Sitte zeigt und unseri Fötteli gmacht. Wo denn alli duregsie sinn, hämmer no es Ständli ghalte für d Christine, wo coronabedingt nit mit uns het chönne mitcho. Denn isches wiitergange ins Mooi, wo mir e feine Brunch hänn dörfe gniesse. Früsch gstärkt und mit e paar Shöttli intus isches denn scho witter gange quer durch Liestel zum Ahfang vom Umzug. Dört hämmer no e bitzli Ziit kah zum pläuderle oder wie in unserem Fall d‘Unterschrifte vo euch z‘sammle. Doch wo‘s „Latärneschränzer, vorwärts marsch!“ gheisse het, isches ernst gworde für uns. Jetzt hämmer müesse zeige, für was mir so lang probt hänn. De Umzug isch guet gloffe, wenn au einigi vo uns bitz unbeholfe gsie sinn und denn d Tön doch nit so usecho sinn wie sie hänn sölle. Doch so lang isch de Umzug denn au nit gange. Nachem Umzug het au bitz Action nit dörfe fähle, denn dass unseri „L“s au effektiv klaut wärde chönne isch nit so präsent gsie in unserne Köpf.

Nichtsdestotrotz hämmer uns wieder versammlet und parat gmacht für de Uftritt bim Züghuusplatz, wo unsere Major sogar vom Wage obe abe dirigiert het!

Langsam aber sicher simmer indr Fasnachtswelt ahcho. Au de Uftritt bim Stabhof isch super gsie.

Nach ei, zwei Fröschli isches denn au scho Ziit gsie zum z‘Nacht ässe. Das hämmer indr Stadtmühli dörfe mache.

Die Stärkig hets brucht, die tiefe Temperature sinn scho nit ganz ohni gsie… und denn isch no s Gässle ufm Plan gstande. Nach verschiedene tolle Uftritt, Fröschli, Pingpong-Konzärt, Bierli, nomol Uftritt, nomol Fröschli …. isches denn au scho bald 02:00 am Morge gsie und mir hänn chönne go ablegge. Für die Eine isches denn in die wohlig Wärmi vom Bett gange, für die andere isch die Wärmi in Form vomene guet bsuechte Chäller cho.

Mäntig

Am Mäntig hänn mir für euch de Neumitgliederapéro organisiert, wo glaub nachem Umzug z Fränkedorf ganz gäbig cho isch. Zu guetem Sound vom Pasci hänn mir dörfe im Takt klatsche, sigs gege unseri Gottis und Göttis oder de Präsi. De mitem beste Taktgfühl isch de Yannick gsie. Er het sich denn dörfe s feinste Bouillonsüppli uswähle. (Zum säge: Ketchup schmeckt sehr grusig, 0/10 Pünkt)

Denoch isch scho Ziit gsie für de Obestreich. Ab jetzt wird d Erzählig e bitz repetitiv, will näbe Uftritt, Fröschli, Bierli, Shöttli, was das Herz begehrt, het nit viel anderes platz kah. Am 02:00 hämmer denn wieder chönne go ablegge. Denn hets e paar vo uns in de Milchguggechäller verschlage. Näbscht gsellige Damene het sichs guet möge verwiile. Wenn öpper ufd Idee chunnt, ellei e Giesschanne voll grüenem Vodka mit Energy z‘bstelle, dörf emol de Claudio froge was er devo haltet.

Uf jede Fall isches e interessante zweite Obe vode Fasnacht gsie.

Zistig

De Zistig het e bitz z‘früeh ahgfange, einigi hänn scho nümm ganz eso früsch usgseh wie am Fotitermin am Sunntig. Vom Stadtmärt us isches mitem Car nach Buebedorf gange, wo mir e Uftritt kah hänn. Dört hets au e mega breiti Uswahl an Verpflegig geh, und zwar Wurst oder Schnitzelbrot. Nach dem Uftritt isches mitem Car witter uf Sissach gsie, wo mir, nachdem mir d Major-Larve quer durch Sissach gschleppt hänn, im Giuseppe Verdi zNacht gässe hänn. D Major-Larve het denn natürlich au wieder quer zruggtreit müesse wärde, will mir denn e Uftritt am Sissacher Guggekonzert kah hän. Ab dött isches qualitativ langsam de Bach durab gange. Leider cha me nit besser spiele je meh Fröschli me trinkt. (Ich ha‘s usprobiert)

Nach de Strossefasnacht hänn mir mit Hilf vom Lüchti und de Evi Tetris gspielt, bis alli Instrumänt und Larve im Büssli platz kah hän. Vo dött us isches z Sissach wittergange, bis es uns endgültig heiverschlage het.

Mittwuch

Am Mittwuch isch de Kinderumzug ahgstande, mit fründliche Temperature. Do mir jo scho bitz abghärtet gsie sinn vom erste Umzug, isch uns dä au scho viel liichter gfalle. De Wasserturmplatzuftritt het viel Zueschauer ahzoge. Nomeh Lüt hänn zueglost, wo mir mit de Milchgugge und de Wasserfallerschränzer zämme s Resi gspielt hänn und unser Wäg ins Dörfli gmacht hänn. Fast alli, usser ei Gugge wo au s Bedürfnis kah het, mit z spiele.

Wo mir unseri Instrument bim Ziegelhof abglade hänn, het de Lieferant vom La Bamba Mordlust verspürt und hätt uns um ei Hoor mit sim Smart überrollt. Zum Glück isch nüt passiert, de Smart isch in‘d Wand ihnegrasslet und het uns allne e chliine Schock hinterloh. D’Handbräms ahzieh isch ebbe scho no öppis tolls.

Nachemne feine Znacht indr Farnsburg simmer denn au scho zämme zude Manor gloffe für de Manoruftritt. Und ab denn isches nümm lang gange und de Ändstreich isch scho losgange. E fiirliche Abschluss für die ersti Fasnacht sit langem.

Fritig

Nach em Donstig wo mir zum entspanne und usruehe gha hend simmer am Friitig erst spoot gstartet und sind zoobe direkt uf Reigoldswil ans Guggefest. Da an dem Tag sust nid vill gloffe isch hets au dem entsprechend vill lüüt gha. D Wassis sind zimmli sicher selber au überrascht worde, denn nach de 8i hets scho ke Smirnoff Ice und kurz druff abe kei grüene Vodka meh gha.

Nichts desto trotz simmer voll motiviert und usgrueht an unsere einzige Uftritt an dem oobe und hend, obwohl durch Corona und Grippe recht reduziert, es solids Konzert ahnegleit. Dernoch isch aber au scho dr offiziell Teil fertig gsii und mir hend no chönne all die andere Gugge (wo nid weniger als 17 Stück gsii sind!) loose und no ei zwei Bierli trinke. Aber au am ändi vo dem Oobe ischs nid langwilig worde, da me bide Taxis scho fast mit Popcorn hetti chönne derzue stoh. Dr eint het am andere sin Standplatz klaut selle Fahrer het denne jene welle Haue und natürlich het keine vo dene ahgfange sondern dr ander! Insider-Infos hend aber veroote dass sich am schluss alli wieder gern gha hend und ihri Problemli alli klärt hend.

Samstig

Unsers Samstigsprogramm hend mir miteme remote Ständli für all unseri Corona-erkrankte gstartet. Per Whatsappvideo hend mir unsere Uftritt vor dr Krone all unsene Mitglieder dehei gwitmet, sodas die au no öppis vom Cherus hend chönne ha. Nachere stärkig ischs au scho wiiter gange mit Gässle. S erste Highlight vo dem Oobe isch unsere Uftritt ufem Züghuusplatz gsii wo mitere Schwiigeminute füre Krieg in dr Ukraine gstartet het.

Dr krönendi Abschluss vodr Fasnacht isch unser Abschlusskonzert vorem Törli gsi womer nomol mit de ehemalige alles geh hend. Nid verwunderlich hets nachem ablegge au eh grossteil vodr Gugge in alte Latärnlikäller verschlage wo doch au no dr eint oder ander Drink gflosse isch. Bim Heigo is denne natürlich au scho widr hell gsii und mir hend no chönne an die schöni Wuche zruggdenke und mit vorfreud an unsere Bummel uns negste Joor.