Kategorie: Gugge-News

Kei Fasnacht 2021

Alles wo meh brucht für e Fasnachtssunntig dehei!
Mir mache s beschte druss und hoffe, dass mir dr nächscht wieder zämme verbringe dörfe🤍

Fasnachtsüberraschig
Fasnachtsüberraschig
Fasnachtsüberraschig

11. November 2020…

Dr 11.11. moll ganz andersch! Wär hätts dänkt, dass au die nächsti Fasnacht abgseit wird🦠
Jedem Fasnächtler bluetet hüt s‘Härz dopplet so fescht!
Aber dr Tag wird cho, wo mir wieder unserer grosse Liideschaft chönne noche go!
Bis zu dem Tag heissts jetzt die Massnahme vom Bund ihzhalte…
Mir zelle uf jede vo euch damit mir das Virus so schnäll wie möglich bekämpfe könne und hoffentlich e tolli Fasnacht 2022 mitenander dörfe fiire!! 🥳
Lueget guet zu euch und blibet gsund!

🦠Corona-Update🦠

Ufgrund vo dr aktuelle Situation werde mr e Probestop bis endi November mache sowie alli Offizielle Aläss bis uf witeres absage.
Gsundehit vo jedem einzelne het höchsti Priorität!
Mir hoffe, dass mir möglichscht bald wieder chönne zämme musiziere und ä paar zämme neh! 🥂🥃🍻

Fasnicht 2020

Liebi Latärnli
Was füre Wuche! Normalerwis schriebi um die Zit mi traditionelle Rückblick über eusi Fasnachtswuche. Leider isch die Fasnacht ganz anders usgfalle als mir eus das vorgstellt hei. Ä Johr lang hämmer eus uf die Wuche vorbereitet und denn wird euses Highlight eifach churzfrischtig abgseit.
Schön wer si worde, do bini überzügt. Mir werä parat gsi, hätte gschränzt, gfiert und ä gueti Zit gha in dä Gasse und Beize vo Lieschtel und Umgäbig. Abr es nützt nüt dr Chopf in Sand zsteckä. Mir hei s Beschte drus gmacht und trotzdäm dr eint oder ander zämme gno. Usnahmesituatione schweisse zämme und ich bi sicher, die sehr emotionali Nid-Fasnacht wird keine vo eus je vergässe!
Danke vilmol liebi Latärnli für die anderi, aber trotzdäm sehr schöni Wuche mit euch. Nöchscht Johr gäbe mr dopplet Gas!
Eure Presi


 

Plagette 2020

D`Lieschtler Plagette isch dusse!

S`disjöhrige Sujet: „Mir pfyffe dr Fahnemarsch“

Falls du no keini hesch, chasch sie am 18./25. Januar oder am 29. Februar vo 08.00 – 17.00 Uhr vorem Stabhof oder Manor cho chaufe!

Wenn dir keis vo dene Date goht kriegsch sie absofort au bi jedem Aktivmitglied!


Stadtfescht Liestal

Inere Wuche isches sowit. Stadtfescht Lieschtel findet Stadt! Mit freue uns riesig uf das Weekend.
Chum au du in unsere Chäller es git die bekannte Füürwägeli und me chan au öbis Esse ha! Unsere Chäller befindet sich vis-à-vis vom Pane Con Carne in dr Salzgasse.
Unsere Chäller het wie folgt offe negst Wuchenend:
Fritig:      17:30 bis 03:00 
Samstig: 12:00 bis 03:00
Sunntig:  11:00 bis 16:30
Nebst em Chäller simer au no Musikalischt vertrette am Stadtfescht Lieschtel!
Do triffsch uns ah:
Fritig:      18:00 Uftritt Stabhofgasse & 19:30 Uftritt Vorplatz Regierungsgebäude 
Samstig: 13:30 Stadtfeschtparade &    17:30 Uftritt Wasserturmplatz
See you there 😀
 
 

Neumitgliederprob

Hesch Luscht mit eus aktiv Fasnacht zmache?
Denn chum unverbindlich an eusi Neumitglieder Prob cho ineluege! Hesch nit chöne verbi cho? Kei Problem! Dene meld dich doch eifach mit dem Kontaktformular!

Fasnacht 2019

Als Archivrum, s wer gsi zum lache, 
het me welle euse Chäller verschache, drum hei mir kämpft an dere Stell, als Harlekin ganz traditionell.
Und zwar trotz Wind und Räge, bi Chälti und Sunne – mir hei au das Johr wie gwohnt wieder immer alles geh. Dir, liebi Fans, Gönner, Ehremitglieder oder Ehemaligi, heits eus verdankt mit tollem Echo bi eusne Uftritt und strahlende Gsichter während dä Umzüg. Mir hei d Frau Fasnacht als riese Huffe mitere super Stimmig dörfe erläbe, für das ä riesigs Dankschön liebi Latärnli! Notürlich nid zletscht an di Cedi, du hesch das au das Johr wieder super gmacht!
Jetz wärde d Zoggeli und s Koschtüm wieder versorgt und d Instrument bis zum Bummel chli gschont, wenn mir es letschts Mol im Rahme vo dr Fasnacht 2019 am Bummel zerscht durd Schwiz und denn durch Lieschtel schränze.
Euse traditionelli Kampf het sich glohnt und dä Fürwägeli gohts nid an Chrage, denn dr Archivbedarf het nochegloh, euse Chäller blibt bestoh! Mir bedanke eus an dere Stell bi dr Stadt Lieschtel und allne Beteiligte wos möglich gmacht hei, dass euse Chäller darf bestoh blibe! 
Ich wünsch euch allne gueti Erholig und freu mi scho ufs nöchschte Johr mit euch Latärnli!
Euri Präsidentin 💚🖤